الخميس 07 يونيو 2018 - 02:09 مساءً

"الرسالة".. قصيدة

كمال ابراهيم

شعر: كمال ابراهيم 

أفكاري يا سفينة النجاة

يا تايهة ف بحور الفراق

شاعر انا .. شاطر اوي

أداوي أوجاع الجميع

واهديهم النور والسلام

والصبر وقت الاشتياق

لكني لو قلبي الحزين

بتصيب حروفي التهتها

 لسّاني فاكر وقتها

لفيت شوارعي كتير أوي

ملقتش حاجه تدلني أرجع منين

ففّضِلت أشبه ع الكلام !!

يمكن ألاقي قصيده واحده تقولي إمتى كتبتني

أو حتى ذكرى يوم ما كنا عيال

" أنا جمله ف وسط كتاب إجابات

مع ان المعنى بتاعي سؤال "

الشطر دا بيضّلني ؟!

وكأنه حارس للهدي ومش راضي يوهبني الطريق

الشعر دا ضدّي الوحيد .. الشعر دا ضدّي الوحيد

مصلحته إني أعيش حياة عراف بيكشف ع القلوب

ويفسر السر الدفين جوه تكوين البشر

وانا كل م اكشف سرهم بكتب كتير

لكني بكتب عنهم مش راضيه تكتبني الحروف

وانا من ملامحي الطيبه ..

بشتاق أدعبس ف القلوب يمكن ألاقي بصيص شبيه

يحضني حضن القرب ف الغربه

مع ان ريحة دمي ريحة الطين

محتاج عيونها تكونلي جنسيه تسقيني طعم الدار ..

 تكوي الوجع بالنار وأنزفها حريه

تبقالي درويشي ..

ساعة الحروب جيشي تلقى الإيمان فيا

عارف انا شكلها وتوبها من توبي

لكني بالتحديد .. معرفش مين هيا ؟!

أوقات بحس الشمس واصفالي عنوانها

نور القمر دلّني عن دراها ومكانها

لكني ساعة الوصل بلاقيها بتفارق

مش ببكي ع المشوار والله مش فارق

لكنها المفتاح اني أعيش لو يوم

بهرب انا ف النوم  يقلق منامي الحلم

يمسك لجام العقل ويشده م الهدار

ويقوله ليه بتروح على سكة اللي يروح

وإزاي تآمنلهم وتقولهم سرك

وانت اللي كانت قوتك .. موجوده ف سكوتك

دلوقتي بتعيشلهم ويعيشوا على موتك

العمر بيفوتك وهييجي يوم وتغيب

وتسلم الدفه للي مشفش البحر

الحق وهات الحلم م الأول

علّم على الغلطات لازم متتكررش

انت اللي يوم مولدك كتب القدر دورك

كونله وكونه تكون من الخالدين

إسمك يعيش مكتوب وينور الميادين

وتقابله وشك بدر وتقوله انا وفيت

تميت رسالتي خلاص وصلتهم نورك

لسّاني فاكر جملتك ليا  ..

انت اللي يوم مولدك كتب القدر دورك

انت اللي يوم مولدك كتب القدر دورك






مقالات



استطلاع رأي

كيف ترى فرص مصر فى الصعود للمونديال؟

  • جيدة
  • متوسطة
  • ضعيفة
Ajax Loader