الخميس 07 يونيو 2018 - 02:03 مساءً

"العالم دايب بكفايه".. قصيدة

أسامة رمضان المزين

شعر: أسامة رمضان المزين

 

الشد فى جسم مريض يخلع روحه

العالم خلف الكاميرات

اهون بكتير من خلع الاشجار لطموحه

فتح عينك غمض قلبك

الشمس بتنزف فى الجرانين

اقرأ ركز هتشوف الدم

فى قلب العالم مش فى العين

الارض فى رحله لحرب امبارح

والجاى من بكره ناقصله سلاح

وانت اللى واقف بين البين

النور عالى فى وش الاموات

كاشف كل حطيان البيت والدمع

هتخش جحور النمل وتسكت

العالم هيطفى فى قلبك كل الشمع

......

العالم اعمى

لابس مولوتوف حوالين جسمه

والناس لابسين فى قلوبهم شاش

الاخضر دولارات والاحمر دم

الاسود عم الصوره والابيض باش

اليود فى جرعه زياده لجسمى

خلانى انام طمعان فى الصبح

الموت هجام وفى عينى النوم

خلانى اجمع فى ايديا الشوم

.....

العالم ليل

وسبع غربان على كتف الشمس

وحمام بيلم سنابل على الشبابيك

وشاويش بيلم الاحلام فى جيوبه

وانت سلاحك معزول فى ايديك

خبى قلبك تحت المطر فى الصيف

الناس بتشرب من الهوا الحزن

وانت اللى جاى فى المعركه ضيف

شايل ولا متشال الشيله بحر

بتعلم صيد السمك بالبنادق

صادق مين يكون  صادق

العالم شارع تحت الخنادق

والكل سلسال فى الرقاب

كف الميزان بالعدل مقلوب

ياوشوش فرمها الطوب

والميرى وسط الزحام

تهرب تروح على فين

والعطل فى الاحلام

....

العالم من فوق

اشيك من فستان مرلين

والبؤس فى ضحك جاهين

وسهره سكر فى بار استلا

الدخان الطالع من همك

 بقا اسود من دخان الفله

انا حيلتى سجاير فرط

واخدهم من همى الشله

بلم الحصا من سكتى لجيبى

احكيلهم عن غربه الاهل للاهل

فى كفى خمس عيون لعيبى

وفى وحدتى طريق مش سهل

بصبر روحى على روحى

واضحك اجدعها قلوب بدموع

تشوف النكته على جروحى

يموت ضحكى صراخ من الجوع

...

العالم تحت

الضحك اسود مش فوشيه

الموت شبه الالوان نصين

فى ايد هتزقك برا اللوحه

وايد تانيه هتخلعلك عين

مهما تلف ومهما تشوف

العالم فخ فى اخره كمين

 

 






مقالات



استطلاع رأي

كيف ترى فرص مصر فى الصعود للمونديال؟

  • جيدة
  • متوسطة
  • ضعيفة
Ajax Loader