السبت 10 فبراير 2018 - 01:15 مساءً

"الأحلام".. شعر

علاء عبد السميع

للشاعـــر: علاء عبد السميع


       -1-
تبدأ بإيه ..؟
الحلم آخر نبض فى عروقك
ورقة توت
بتجف
عصفور ع الأرض زى بنى آدم
رفرفت حواليه اصطناعى
مش منتبه
منقاره لايعرف غير نبش التراب
وجناح بيتطوح ورا وقدام
فى خطوته المعتادة
وانت بتفرد دراعاتك ملو لفضا
لابتعرف وجهتك
وجناحك المحموم  ما رف

         _2_
( القدس عروس عروبتنا )
يا صاحبى
أجل بسمتك
لحين انتهاء "مظفر"
من توقيع عقوبته الفموية على الحكام
أقم وجهك
فى الكافيتريا
مكان قعدتنا المفضلة
تحت صورة "ابو عبد الله" وسط الحفاة
والملكة "إيزابيلا" و "وفرناندو" بالزهو المسموم المفتعل
ومفتاح غرناطة الأسير
من غير جناح.. أو حلم
مش بيحاول الطيران

       -3-
بتلف ليه ع الناس
تشترى وتبيع
وخلفك صبية "بهية"
شايلة طفل رضيع
تبيع يا خال..
اشترى يا عم..
وف كل مرة بتزيد العيال ع الكتف
وف كل مرة
الصبية
تختفى وتضيع..!

             -4-
فى كل الهوامش.. مكان للخيول
ولجل الفوارس تنام ع الحرير
مفيش لازمة أبدا..
لدق الطبول ..!
                .....
والخيل بتصهل كل طلعة شمس
والفارس العربى المؤجل
خلفه درع وسيف
سهران بيتمنى:
للعدا نفاد الصبر ..
وللتراب التبر ينده له.. ندا بترول
ولسيفه إذا ملك الخريطة
ينتشى بتوزيع الغنايم
أنا...
أنا...
أنا الذى..
أخشى الوغى..
                 ... وأضج عند المغنم






مقالات



استطلاع رأي

كيف ترى فرص مصر فى الصعود للمونديال؟

  • جيدة
  • متوسطة
  • ضعيفة
Ajax Loader