الثلاثاء 16 يناير 2018 - 02:43 مساءً

"عمري تذاكر سفر".. قصيدة

الطيب أبو شوشة

شعـــر: الطـيب أبو شـوشة

مش بس اسمي ما اخترتهوش
مش بس بلدي ولوني أو ديني
تلاتين سنه ما املكش فيهم غير
عمر اتحسب منى عدد سنوات
وحاجات قصادها سبت كل حاجات
خطوات تعافر سكتى الواعره
وف بكرا حلم مصدقه بضمير
تلاتين سنه وأنا لسه متعشم ف خير
وبراح ف قلبي لسه فيه للغير
حنّيت لبنت تكون لي مره حبيب
وطبيب يداوي الجرح من أصله
كان الفراق أسرع من الأحداث
أنا كل ناس أخترتهم سابوا
عمرى ماسبتش قبلهم ومشيت
حبيت كتير هما ما حبونيش
تفاصيل غريبه وليه ما تشبهنيش
عايش مع العايشين جسد بلا روح
معرفش قلبي إللي اتوجع
ولا أنا المجروح
البوح ف صدري خزنه للأسرار
ف الدار غريب وف غربتي مغترب
جوايا مليون صوت
صوتي الوحيد مضطرب
مقسوم هنا وهناك...
بين البينيين اتنين
حضنيين ما بيدفوش
كام مره رايح جاى!
ف الرحلتين غصه
قصه ف كل ذهاب
ف رجوع كمان قصه
وأبكي وانا مبتسم
وف حلقى طعم مرار
عمري تذاكر سفر
شنطه وكيس ومطار
قررت إني أختار
ما اخلصش بين مطارين.






مقالات



استطلاع رأي

كيف ترى فرص مصر فى الصعود للمونديال؟

  • جيدة
  • متوسطة
  • ضعيفة
Ajax Loader