السبت 23 سبتمبر 2017 - 12:51 مساءً

الحقيقة.. قصيدة لـ أحمد عبد الخالق

أحمد عبد الخالق

والحقيقة ..

غيَّرِتنا كتير دقيقة

غيرتنا ساعات بـ تِمشي

دون ما حتّي تقول وداع

جدي أول ايد حوتني

واحتوتني عَ المشاع

ابتسامتي في ابتدائي

لما مِستر قالي شاطر

نظرَه في عيون اهلي ليا

جَنبِتني كتير مخاطِر

فرحتي فـ كُتَّابي لمَّا

انتهيت من جزء عم

واتجَهت لـ سِير تبارَك

وأما قالوا طلِعت أول

قالوا يومها كتير مُبارك

وأما يوم الجمعة ييجي

نسمع الشعراوي جَري

وأما نِتجمع في عيلة

كله يِهرِي فـ أي هَري

يوم ما كَسَّرت الازازة

جدي قال معلش عيل

وأما أبويا قال يا جِنّي

قاله طالِعلي المِنَيِّل

حصة الألعاب معادها

تقسيمِتنا فـ كُل ماتش

كابتني اللي اداني ضربَة

أي لمسة وأي تاتش

صُحبِتي اللي فـ اولَي أول

أحمد الليبي و إيهاب

وأما نِزعل بس عينّا

بتصالِحنا بدون عتاب

وأما نِتجمَّع في لَمَة

نُكتة بايخة نقول يا بيئة

وأما وقت الكسرة ضَمَّة

تِنسَي بيها أي ضيقة

والحقيقة ..

غيَّرِتنا كتير دقيقة

بس سابت ذِكريات

كُل ذِكري فـ قلبي عايشة

تنتهي وقت الممات!






مقالات



استطلاع رأي

كيف ترى فرص مصر فى الصعود للمونديال؟

  • جيدة
  • متوسطة
  • ضعيفة
Ajax Loader