السبت 23 سبتمبر 2017 - 12:47 مساءً

هتكتب ليه؟.. قصيدة لـ سيد مرسى

سيد مرسى

ورسم الكحلة للرحلة ملوش تفسير

وفيض مالجنة يتحنى بصبايا الخير

أنا مسافر منيش كافر سوى بشياطين

بتهوى تعلى ف البنيان ..

مفاجأة بتصنع الإنسان  معاها ريموت

بتضغط عالزرار فيطير ..

بنص وله 200 تفسير

مسيرك يوم تلاقى جعان

ومين مالخضة مقدرشى يواسى صديق 

ماكنت رفيق .. وكنت طريق يضيق فيطيق

وباتوَسَّع بنور من ضى

بتضرب حى ..

فبيخافوا الصغار يجروا

مع اللى كبار وبيتاجروا وبيفاجروا

وبيهاجروا لوطن تانى ... هناك عفريت

هناك حواديت بنتسلى فنحكيها

وننزل شغل بعديها

ساعات تركبنا 100 موجة

ساعات ننزل .. نقول هوجة

ساعات نتذل مالحوجة

ساعات والساعة معووجة

وبتخرف فى ايد قاضى..

 بيتصرف فى عرف  قانون

بعزف  النون

ساعات بامشى تجيلى ظنون ..

بأن الغابة كات أرحم من الأسفلت

وكونى رحلت .. مش معناه مانيش بينكم

مانيش بيكم ..

أنا اللى اتبعت وشاريكم

أنا اللى ما تبت ..هاهديكم

أنا اللى زرعت .. باهديكم

أنا اللى كتبت لنخيلها

أنا اللى ارتابت .. ناخلها

وناخيلها القمر فى النيل

وبارخيلها فتحدف سيل

أقول هاتميل ؟ ..وتحذف ويل ؟

فتعزف للنهار بالجود

وترضى بقسمة الموجود

ووردك لو صحيح مورود

هاتكتب ليه؟






مقالات



استطلاع رأي

كيف ترى فرص مصر فى الصعود للمونديال؟

  • جيدة
  • متوسطة
  • ضعيفة
Ajax Loader