السبت 23 سبتمبر 2017 - 01:32 صباحاً

"تفاصيل حكايه بتبتدي".. قصيدة لـ ريم عصام

ريم عصام

عارفه صوتى

مش بيروي الشوق ف قلبك زي صوتك

لما يلمس روحي ويفرّح سمايا بطلّتك

عارفاك ف بُعدك

مش كفايه عليك كلام جاي من بعيد

ما فيهوش ملامح شئ جديد

زي نقش حروف ف لحظه بيتمسح

عارفاك بتهوى اللمسه

والحضن اللى متسكّن بجرعة الإشتياق

طال الغياب

والقلب حاسس لهفتك

ومافيش ف غيبتك حد ينفع للسند

قُربك مدد

من غيره روحي بتتهدم

زاهده الحياه والناس وكل الأمكنه

متمّكنه الدمعات بقوه من العيون

وإزاى يكون العُمرمن غير الخطاوي

المرسومين على شط حافظ سرهم

وف شرع مين !!

أسوارمدينتك تتقفل من غير وجودي ف عرشها

أو إن ضى عيوني غيرك يلمحه

وكإننا ف دنيا الميزان فيها اتقلب

شوفنا العجب

قلبين ف حُكم الدنيا تاهوا بدون سبب

ما يجوزش ليهم يلتقوا

أو نبضهم يسكن حواري العشقانين

يرسم ملامح بكره متزوّق بألوان السما

وكإن قوانين الخلايق مسنونين

بس لوجعهم والدموع ...

شايفين غرامهم معصيه

والبوح بشوقهم

وسط حضرة كون ماليه الكُره جهرًا

ذنب لازم ينتهي

لكن الحقيقه ف نور عيونهم مش كده

وحده القدر عارف نهاية حزنهم

موصوف يا طعم الصبر لجل المُغرمين

والكلمه ف ميزان المشاعر بالحساب

حبة قصايد مكتوبين

لسه الحروف ماشافتش نور شمس النهار

لسّاك يا بكره مخبّي ليلهم

عن عيون القسوه والجبروت

عُمر الحكايه ما تنتهي بموت القلوب

تفاصيلها لسه بتبتدي

بس بهداوه تعلّم الدنيا المعاني المُبهمه

إزاي يكون العشق والحلم بشغف

إزاي قلوبنا تخطي فوق جمر الألم

وتعدي كل الصعب تكسر قوّته






مقالات



استطلاع رأي

كيف ترى فرص مصر فى الصعود للمونديال؟

  • جيدة
  • متوسطة
  • ضعيفة
Ajax Loader