السبت 02 سبتمبر 2017 - 01:37 مساءً

"فاكرة دايما".. قصيدة لـ د. رحمة فتوح

د. رحمة فتوح

عقلي رافض

فكرة البُعد اللي بيننا

كل كلمة و كل فكرة

عندي دايما ناقصة سِنَّة

طقمي ناقص أي حاجة؟

طب أغيّر أي حاجة؟

طرحتي مظبوطة يعني؟

مين بحبه ومين بايعني

كل تفصيلة في حياتي

 كنتي فيها

كنت اوافق

ع الخروجة اللي تروحيها

الحاجات بَعدِك هنا

مابقتش هيّ

ورْجِعت تاني

زي عادتي بيتوتية

بس بين روحك وروحي

حاجة أكبر م المسافة

حاجة أكبر م الزمن

حاجة مهما العمر يجري

أغلى من مليون تمن

فاكرة دايماً

كل مرة خفت فيها

وانتي كنتي لي الأمان

ما انتي عارفة قلبي يعني

قلب خايب من زمان

فاكرة سهرتنا سوا

ياللي إحساسِك دوا

ياللي عمري

جنب منك زي جنَّة

ياللي بُعدِك

كان أساساً مش في بالنا

هو مين في الدنيا أصلاً

قلبه عاشق للفراق

مش بإيدي ومش بإيدك

الطموح والغربة دايماً

كلمتين بينهم وفاق

شوفي بيننا كام مكالمة

وكام رسالة!

بس برضه بتوحشيني

عارفة لما تكلميني ؟

ببقى عاملة نفسي باردة

والعياط باين في عيني

فاوعي أبداً تسأليني

أصل عقلي لسه رافض

فكرة البُعد اللي بيننا

والحاجات دايماً هتفضل

ناقصة بَعدِك عندي سِنَّة






مقالات



استطلاع رأي

كيف ترى فرص مصر فى الصعود للمونديال؟

  • جيدة
  • متوسطة
  • ضعيفة
Ajax Loader