السبت 26 أغسطس 2017 - 02:40 مساءً

"اتعذب وحدك".. قصيدة لـ سوزان كمال

سوزان كمال

جربت تعيش مدبوح

بتنوح وتبوح وبـصوت مبحوح

يترد ف قلبك وميطلعش؟؟

جربت تنام وتقوم مهموم

موجوع وشجون وجروح وشحوب ف الروح

كل ده وعيونك متدَّمَّعـش؟؟؟

جربت تلملم حكاياتك تلاقيك مهزوم

متهان، وانك تتعكز ع الأحزان

وتبان فرحان

مع إنك من جواك متخان

خوانة الدنيا مبتريحش!!!

جربت المشي على الكورنيش

والصحبة كوفية مبتدفيش

والمطرة دموع

بتنشن على طراطيف الروح

لكن بشــويش

وتمد قلوع لحبيب ميجييش

جربت تعيش فنجان على رف أخير

ف النيش

جربت تخاف؟ وتعيش خواف؟

وفراق وعذاب وشجن وغياب

مع إنه هناك الباب ف الباب

لكن أغراب

والنظرة ف عينك متـقَّربش

ان كنت مجربتش لسـَّه

أرجوك وحياتك متجربش

وان كان ولابد تشوف وتعيش

اتفضل عييش

وحبيبك لو م النوع اياه

اتعذب وحدك ومتحـكيييش

 

 






مقالات



استطلاع رأي

كيف ترى فرص مصر فى الصعود للمونديال؟

  • جيدة
  • متوسطة
  • ضعيفة
Ajax Loader