الأربعاء 23 نوفمبر 2016 - 04:12 مساءً

اتعلموا التضحيه بشرف والعمل بإتقان.. من "مسعده" بتاعة البتنجان

مسعده

تقرير تكتبه: منى الشيخ
 
ستات كتير شقيت علي ولا دها بعد جوزها ما مات، و اللي عندها طفل معاق ذهنيا وكرست صحتها و عمرها علي تربيته، و اللي اتطلقت و اترمت بعيالها في الشارع و كانت لوحدها و ربتهم أحسن تربية..
 
الستات دي في مصر بتزيد مش بتقل، مابقتش ظاهرة، بقي عادي جدا راجل يرمي ولاده و يقرر يشتري نفسه و دماغه والست اللي تشيل، كأن التضحية لازم او غالبا تكون من نصيب الست، الست دي بالذات لفتت نظري جدا، علي عربية بسيطه بأربع عجلات، كانت حاطه ولادها الاطفال، ويوميا اشوفها بتجر العربيه بولادها، و بترجع بيهم من نفس الطريق اخر اليوم..
 
سألتها اجيلك فين .. قالتلي انا في المكان دا و شاورت علي شارع ضيق قدام الجامعه الأمريكية، زرتها تاني يوم في مكان "ما قالت" شارع ضيق فيه عربيه فول، و هي بعربيتها بتبيع الباذنجان المقلي و المخلل و بطاطس محمره..
 
اسمك ايه يا حبيبتي، قالتلي "مسعده" حكتلي عن مشوارها اللي بدأ من ٢٠ سنة، تركت قريتها في المنوفية و اتجوزت و شالت الحمل مع جوزها، و لما خلفت العيل السابع طفش و ماتعرفش عنه اي حاجه.
 
لما كان موجود كانت مسعده شايلة المسئولية، كانت تاخد طفلتها المولودة في مشنه علي العربيه و تنزل تبيع الباذنجان و ترجع بقوت يومها لجوزها و بنتها، فضلت تشتغل طول عمرها ، النهارده هي عايشه في حجره داخل حجره في السيدة 

زينب، و عندها ٧ اطفال، أكبرهم نعيمه ،اللي شايلة أصغر اخواتها "نعيمة" تركت المدرسة لآن الدروس الخصوصيه غالية جدا و قدرات امها يا دوب تأكلهم.
 
اثناء حواري مع مسعده و نعيمة زبائن كتير طلبت ساندوتشات، لاحظت انها كريمه جدا، عمري ما شفت ساندوتشات مخدومه بالشكل دا، و حصل انها قالت لراجل و هي بتديلوا طلبه، هات الفلوس وقت ما تحب يلا بالهنا، مسعده الغلبانة بتكرم الغلابة اللي زيها، و بتحن عليهم.. جت زبونه تانيه واضح انها موظفه في شركه او وزاره قريبة من المكان.. قالتي انا اعرف مسعده من سنين و باعتبرها اختي و يوميا لازم أفطر عندها - الكرم كله و النضافه- و قالتلي تعرفي انها بتغير زيت القليه كل يوم، باشوف كلامها صح ولا لا ، اتفاجأت فعلا ان الزيت نضيف، مسعده صلبة بشكل أذهلني، متفائله و مكافحة و شهمة "راجل بمعني الكلمه" اللي زي نعمة مايكفيناش نساعده و ندعيلوا، اللي زيها ننحي له و نفضل نتكلم عنه.
 
اذا كان يجب نبحث عن القدوه و نعلمها لولادنا، اذا كان يجب نشاور علي القيم في وجوه أعطاها الزمن ضهره، اذا كان لابد نفتخر و نقدر و نتعلم، فالمفروض يكون كل دا، من نصيب مسعده.





مقالات



استطلاع رأي

هل تتوقع اثرا ايجابيا على الاقتصاد من تعويم الجنيه؟

  • نعم
  • لا
  • لست أدري
Ajax Loader